تاج آوا

تو چی آساره‌یا دیری د اوج آرزویامی

تو د برزی متلیامی، تو سربیت سرویامی

د نازت نیزه می‌واره، منم وا زخمیا کاریت

دلم سینه سپر کرده د زیر رفت نازاری ت

د شعر شانومه چشیات یل روسم نشو داری

د سیلت موئه حن ایمشو سر سُراوکُشو داری

چنو قیقاچ میری که گمو کردم قدم‌خیری

تو گرّینی که افتاونِ ری تخت شونیات مئیری

نئیمه چی تو بی‌رَمی، نئیمه چی تو نازاری

که چی شمشیر برّونی غلاف مخملی داری

دلکم چی چو تری د مینِ تژگا

چق و پوقش پیچسه د کل دنیا

و رسم دل‌تپه‌ دارُ موحونم سی دل دردو

چی تل حشگی افتامه د چنگ باد سرگردو

د سیلت دیم که سیمرغی د قاف چشیات پر زه

د زیر تیزپروبالش زمی دل داره می‌لرزه

نها پات کهکشو نم بی، د سیلت آسمو گم بی

چنو که باد سرکش وا اشاره چشیات رُم بی